[Tea-Table Miscellany Contents]
JONNY.
THO’ for seven years and mair, honour shou’d reave me,
To fields where cannons rair, thou need na grieve thee:
For deep in my spirits thy sweets are indented;
And love shall preserve ay what love has imprinted.
Leave thee, leave thee, I’ll never leave thee,
Gang the warld as it will, dearest, believe me.
–
NELLY.
O Jonny, I’m jealous whene’er ye discover
My sentiments yielding, ye’ll turn a loose rover;
And nought i’ the warld wad vex my heart fairer,
If you prove unconstant, and fancy ane fairer.
Grieve me, grieve me, oh it wad grieve me!
A’ the lang night and day, if you deceive me.
–
JONNY.
My Nelly, let never sic fancies oppress ye,
For while my blood’s warm, I’ll kindly caress ye:
Your blooming saft beauties first beeted love’s fire,
Your vertue and wit make it ay flame the higher.
Leave thee, leave thee, I’ll never leave thee,
Gang the warld as it will, dearest, believe me.
–
NELLY.
Then, Jonny, I frankly this minute allow ye
To think me your mistris, for love gars me trow ye
And gin ye prove fause, to ye’r sell be it said then,
Ye’ll win but sma’ honour to wrang a kind maiden.
Reave me, reave me, heavens! it wad reave me
Of my rest night and day, if ye deceive me.
–
JONNY.
Bid iceshogles hammer red Gauds on the studdy,
And fair simmer mornings nae mair appear ruddy:
Bid Britons think ae gate, and when they obey ye,
But never till that time, believe I’ll betray ye.
Leave thee, leave thee, I’ll never leave thee;
The starns shall gang withershins e’er I deceive thee.
