[Tea-Table Miscellany Contents]
SWeet sir, for your courtesie,
When ye come by the Bass then,
For the love ye bear to me,
Buy me a keeking-glass then.
Keek into the draw-well,
Janet, Janet;
And there ye’ll see ye’r bonny sell,
My Jo Janet.
–
Keeking in the draw-well clear,
What if I shou’d fa’ in,
Syne a’ my kin will say and swear,
I drown’d my sell for sin.
Had the better be the brae,
Janet, Janet;
Had the better be the brae,
My Jo Janet.
–
Good sir, for your courtesie,
Coming through Aberdeen then,
For the love ye bear to me,
Buy me a pair of shoon then.
Clout the auld, the new are dear,
Janet, Janet,
Ae pair may gain ye haff a year,
My Jo Janet.
–
But what if dancing on the green,
And skipping like a mawking,
If they shou’d see my clouted shoon,
Of me they will be tauking.
Dance ay laigh, and late at e’en,
Janet, Janet,
Syne a’ their fauts will no be seen,
My Jo Janet.
–
Kind sir, for your courtesy,
When ye gae to the cross then,
For the love ye bear to me,
Buy me a pacing horse then.
Pace upo’ your spinning-wheel,
Janet, Janet;
Pace upo’ your spinning-wheel,
My Jo Janet.
–
My Spinning-wheel is auld and stiff,
The rock o’t winna stand, Sir,
To keep the temper-pin in tiff,
Employs aff my hand, Sir.
Make the best o’t that ye can,
Janet, Janet;
But like it never wale a man,
My Jo Janet.
