AS I came in by Tiviot-side,
And by the braes of Branksome,
There first I saw my bonny bride,
Young, smiling, sweet and handsom;
Her skin was safter than the down,
And white as alabastar;
Her hair a shining wavy brown;
In straightness nane surpast her.
Life glow’d upon her lip and cheek,
Her clear een were surprising,
And beautifully turn’d her neck,
Her little breasts just rising:
Nae silken hose with gooshets fine,
Or shoon with glancing laces,
On her fair leg, forbad to shine,
Well shapen native graces.
Ae little coat, and bodice white,
Was sum of a’ her claithing;
Even these o’er mickle; – mair delyte
She’d given cled wi naithing:
She lean’d upon a flowry brae,
By which a burny trotted;
On her I glowr’d my saul away,
While on her sweets I doated.
A thousand beauties of desert,
Before had scarce alarm’d me.
‘Till this dear artless struck my heart,
And bot designing, charm’d me.
Hurry’d by love close to my breast,
I grasp’d this fund of blishes;
Wha smil’d, and said, without a priest,
Sir, hope for nought but kisses.
I had nae heart to do her harm,
And yet I coudna want her;
What she demanded, ilka charm
Of her’s pled, I should grant her.
Since heaven had dealt to me a routh,
Straight to the kirk I led her,
There plighted her my faith and trowth,
And a young lady made her.