Of a’ the Airts the Wind can Blaw.
Words by Burns.
Air by Wm. Marshall.
Arranged by Finlay Dun.
–
Of a’ the airts the wind can blaw,
I dearly like the west,
For there the bonnie lassie lives,
The lass that I lo’e best,
Tho’ wild woods grow, and rivers row,
Wi’ monie a hill between,
Baith day and night, my fancy’s flight,
Is ever wi’ my Jean.
–
I see her in the dewy flow’r,
Sae lovely, sweet, and fair,
I hear her voice in ilka bird,
Wi’ music charm the air;
There’s not a bonnie flow’r that springs,
By fountain, shaw, or green,
Nor yet a bonnie bird that sings,
But minds me o’ my Jean.
–
O blaw ye westlin’ winds, blaw saft
Amang the leafy trees;
Wi’ gentle gale, frae muir and dale,
Bring hame the laden bees;
And bring the lassie back to me
“Wi’ her twa witchin’ een;”
Ae blink o’ her wad banish care,
Sae charming is my Jean!
–
What sighs an’ vows amang the knowes,
Hae past atween us twa!
How fain to meet, how wae to part,
That day she gaed awa’!
The pow’rs aboon can only ken,
To whom the heart is seen,
That nane can be sae dear to me,
As my sweet lovely Jean!
