Hughie’s Monument, pp.44-46.

[Horace in Homespun Contents]

Non omnis moriar.” – CAR. III. 30. 

IN vain the future snaps his fangs, 

The tyke may rage – he canna wrangt’s, 

I put my haund upon my sangs 

Withoot a swither; 

To me this monument belangs, 

I need nae ither. 

– 

It’s no’ in granite to endoor, 

Sandstane comes ripplin’ doon like stoor, 

Marble – it canna stand the shoo’r, 

It lasts nae time; 

There’s naething yet has hauf the poo’r 

O’ silly rhyme. 

– 

The pyramids hae tint their tale, 

It’s lang sin’ they begoud to fail, 

They’re either murlin’ doun to meal 

Or fog-enwrappit, 

While Homer at this hoor’s as hale 

As e’er he stappit. 

– 

Sae I may say’t withoot a lee, 

I dinna a’thegither dee; 

Therefore forbear to greet for me 

When I’m awa, 

An’ keep a dry, a drouthie ee, 

I chairge ye a’. 

– 

When at my door the hearse draws up 

An’ Kate haunds roun’ the dirgy-cup, 

Nae friend o’ mine will tak’ a sup 

For that the less, 

But calmly wi’ a steady grup 

Cowp owre his gless. 

– 

The better part o’ me remains! 

Whaur Allan Watter weets the plains, 

An’ Devon, crystal but for rains, 

Gangs wanderin’ wide, 

Lang after me ye’ll hear my strains 

On Ochilside. 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s