[Tea-Table Miscellany Contents]
To the Tune of, The Kirk wad let me be.
–
‘TIS I have seven braw new gowns,
And ither seven better to mak,
And yet for a’ my new gowns;
My wooer has turn’d his back.
Besides I have seven milk-ky,
And Sandy he has but three;
And yet for a’ my good ky,
The ladie winna ha’e me.
–
My dady’s a delver of dikes,
My mither can card and spin,
And I am a fine fodgel lass,
And the siller comes linkin in:
The siller comes linkin in,
And it is fou fair to see,
And fifty times wow! O wow!
What ails the lads at me?
–
When ever our Baty does bark,
Then fast to the door I rin,
To see gin ony young spark
Will light and venture but in:
But never a ane will come in,
Tho’ mony a ane gaes by,
Syne far ben the house I rin;
And a weary wight am I.
–
When I was at my first prayers,
I pray’d but anes i’ the year,
I wish’d for a handsome young lad,
And a lad with muckle gear.
When I was at my neist prayers,
I pray’d but now and than,
I fash’d na my head about gear,
If I get a handsome young man.
–
Now when I’m at my last prayers,
I pray on baith night and day,
And O! if a beggar wad come,
With that fame beggar I’d gae.
And O! and what’ll come o’ me?
And O! what’ll I do?
That sic a braw lassie as I
Shou’d die for a woer I trow.
