[Tea-Table Miscellany Contents]
To the Tune of, Where shall our Goodman ly.
–
HE.
WHere wad bonny Anne ly?
Alane nae mair ye maun ly;
Wad ye a goodman try?
Is that the thing ye’re laking?
–
SHE.
Can a lass sae young as I,
Venture on the bridal tie,
Syne down with a goodman ly?
I’m flee’d he keep me wauking.
–
HE.
Never judge until ye try,
Mak me your goodman, I
Shanna hinder you to ly,
And sleep till ye be weary.
–
SHE.
What if I shou’d wauking ly,
When the hoboys are gawn by,
Will ye tent me when I cry,
My dear, I’m faint and iry?
–
HE.
In my bosom thou shall ly,
When thou waukrife art or dry,
Healthy cordial standing by,
Shall presently revive thee.
–
SHE.
To your will I then comply,
Join us, priest, and let me try
How I’ll wi’ a goodman ly
Wha can a cordial give me.
