[Tea-Table Miscellany Contents]
THE lawland maids gang trig and fine,
But aft they’re sour and unco sawsy;
Sae proud, they never can be kind
Like my good humour’’ highland lassie.
O my bony, bony highland lassie,
My hearty smiling highland lassie,
May never care make thee less fair,
But bloom of youth still bless my lassie.
–
Than ony lass in borrows-town,
Wha mak their cheeks with patches motie,
I’d tak my Katie but a gown,
Bare-footed in her little coatie.
O my bony, &c.
–
Beneath the brier or brecken bush,
When e’er I kiss and court my dautie;
Happy and blyth as ane wad wish,
My flighteren heart gangs pittie-pattie.
O my bony, &c.
–
O’er highest heathery hills I’ll stenn
With cockit gun and ratches tenty,
To drive the deer out of their den,
To feast my lass on dishes dainty.
O my bony, &c.
–
There’s nane shall dare by deed or word
‘Gainst her to wag a tongue or finger,
While I can weild my trusty sword,
Or frae my side whisk out a whinger.
O my bony, &c.
–
The mountains clad with purple bloom,
And berries ripe, invite my treasure
To range with me; let great fowk gloom,
While wealth and pride confound their pleasure.
O my bony, bony highland lassie,
My lovely smiling highland lassie,
May never care make thee less fair,
But bloom of youth still bless my lassie.
