[Tea-Table Miscellany Contents]
A Cock laird fou cadgie,
With Jenny did meet,
He haws’d her, he kiss’d her,
And ca’d her his sweet
Wilt thou gae alang
Wi’ me, Jenny, Jenny?
Thouse be my ain lemmane,
Jo Jenny, quoth he.
–
If I gae alang w’ ye,
Ye maunna fail,
To feast me with caddels
And good hacket-kail.
The deel’s in your nicety,
Jenny, quoth he,
Mayna bannocks of bear-meal
Be as good for thee.
–
And I maun hae pinners,
With pearling set round,
A skirt of puddy,
And a wastcoat of broun.
Awa with sick vanities,
Jenny, quoth he,
For kurchis and kirtles
Are fitter for thee.
–
My lairdship can yield me
As meikle a year,
As had us in pottage
And good knockit beer:
But having nae tenants,
O Jenny, Jenny,
To buy ought I ne’er have
A penny, quoth he.
–
The borrowstoun merchants
Will sell ye on tick,
For we maun hae braw things,
A beit they soud break.
When broken, frae care
The fools are set free,
When we make them lairds
In the abbey, quoth she.
